কাম'র মানুষ আম'রার মেয়র

এম হাসানুল হক উজ্জলঃ হক্ক কথা মাততে গেলে ওখান-উ মাতা লাগবো যে, আম'রার বিয়ানীবাজারর মেয়র আব্দুস শুক্কুর ভাইছাব মাতে নায় তাইন কামে বিশ্বা'সী ।

এই জীবনে কত নেতা দেখলাম মুখে মাতইন এখান আর করইন আরোখান। আর ইতা কারবারর কান্দাকাছাত তাইন নায়। মেয়র ওইয়া হারলেউ তাইন কইছলা সুন্দর বিয়ানীবাজার বানাইবা। চেষ্টা করার কমতি কররা না। আম'রার খাসলত আরো ভালা অইলে বিয়ানীবাজার ইকান সুন্দর অইতে সময় লাগল না ওনে।

যে কথা কইতাম চাইয়ার ওখানউ কই। মায়ার ভাইগনা আলী হোসেন ফেইস বুকর ইনবক্সও ফটু দুখান দিয়া লেখছইন মামা আফনার লেখা কাম লাগছে। আমি চোউখ চশমা লাগাইয়া দেখি বেটাইনতে কামান লইয়া আটিতরা। আর কামান থাকি ধুমা বারর।
দুই দিন আগে পোস্টাফিস রউডও এডিস মশার জনম অওয়ার কথা লেখিয়া আরো ইতা লইয়া কততা লেখছি। বিউটির মায় ইকান পডিয়া কইলা মেয়র তোমা'র উপরে বেজার অইবা। লাইনে বেলাইনে ইলা লেখ খেনে। আমি কইলাম তাইন বেজার অওয়ার পাবলিক নায়। ইতা তাইন পড়ইন না।

আইজ ভাইগায় ফটু দুই খান দেওয়ার বাদে বুঝলাম তাইন হক্কলতা পড়ইন।

মেয়র ভাইছাবরে কইয়ার এখলগে হখলখানর মশাগুইন মা'রিলাউক্কা। নাইলে ইগুনতর কামড়ানির দাম কোনখান বওয়া যায় না।
হক্কতার বাদে আফনারে ধন্যবাদ দিয়ার।